Գլխավոր էջ Մամլո հաղորդագրություններ Հրապարակվել է ՀՀ ԱԺ 2018 թ. դեկտեմբերի 9-ի արտահերթ ընտրությունների դիտորդական առաքելության ամոփիչ զեկույցը
Մամլո հաղորդագրություններ
2019 Ապր
10

Հրապարակվել է ՀՀ ԱԺ 2018 թ. դեկտեմբերի 9-ի արտահերթ ընտրությունների դիտորդական առաքելության ամոփիչ զեկույցը

Ապրիլի 8-ին կայացած հանրային քննարկման ընթացքում ներկայացվել է «Հայաստանի Հանրապետության Ազգային ժողովի 2018 թ. դեկտեմբերի 9-ի արտահերթ ընտրությունների դիտորդական առաքելության ամփոփիչ զեկույցը»: Այն արտացոլում է ՀՀ Ազգային ժողովի արտահերթ ընտրություններին «Ականատես» դիտորդական առաքելության իրականացրած երկարաժամկետ և կարճաժամկետ դիտորդության արդյունքները, գնահատելով նախընտրական, քվեարկության օրվա և հետընտրական գործընթացների համապատասխանությունը ՀՀ ընտրական օրենսդրությանը և միջազգային չափանիշներին, ինչպես նաև գործընթացների հնարավոր ռիսկերը ազատ, թափանցիկ և մրցակցային ընտրություններ անցկացնելու տեսանկյունից։

«Ականատես» դիտորդական առաքելությունն առաջին անգամ իրականացրել է  երկարաժամկետ դիտորդություն, որի ընթացքում 35 երկարաժամկետ դիտորդներ 2018 թ. նոյեմբերի 5-ից մինչև դեկտեմբերի 23-ն ընկած ժամանակահատվածում դիտարկել են նախընտրական և հետընտրական գործընթացները հանրապետության բոլոր 38 տարածքային ընտրական հանձնաժողովների սպասարկման տարածքներում։

Ինչ վերաբերում է կարճաժամկետ դիտորդությանը, Հայաստանում առաջին անգամ համապետական ընտրությունների ընթացքում կիրառվել է ընտրանքի վրա հիմնված դիտորդության (sample-based observation) մեթոդաբանությունը, որի շնորհիվ ընտրված տեղամասերում դիտարկված քվեարկության պատկերն արտացոլում է հանրապետության ողջ տարածքում կայացած ընտրությունների ընդհանուր պատկերը: Քվեարկության օրն «Ականատես»-ն իրականացրել է դիտորդություն ՀՀ տարածքում բաշխված 300 տեղամասային կենտրոններում (ընդհանուրի մոտ 15%-ը)՝ 575 դիտորդի ներգրավմամբ: Բացի այդ գործել է շրջիկ դիտորդների 52 խումբ, որոնք այցելել են 552 տեղամաս: Սփյուռքում գտնվող մի խումբ կամավորներ օրվա տարբեր ժամերին ստուգել են 13 տարածքային ընտրական հանձնաժողովների սպասարկման տարածքների 500 տեղամասերի տեսանկարահանող սարքերի աշխատանքը՝ պարզելու, թե որքանով է տեսանելի քվեարկության սենյակը և գնահատել տեսանկարահանման որակը:

Ընտրական գործընթացներում արձանագրված էական խախտումների հիման վրա, ընդհանուր առմամբ, կազմվել և ներկայացվել է 26 դիմում տարածքային ընտրական հանձնաժողովներ, 20 դիմում-բողոք՝ ԿԸՀ, 16 հայցադիմում՝ ՀՀ Վարչական դատարան, 4  գործով` բողոքներ վերաքննիչ և վճռաբեկ դատարաններ, 4 գրավոր և բանավոր հաղորդում հանցագործության մասին՝ ՀՀ հատուկ քննչական ծառայություն և ՀՀ ոստիկանություն: Դիմումների-բողոքների մի մասի քննությունը դեռևս ընթացքի մեջ է:

«Ականատես» դիտորդական առաքելությունն իրականացվել է Եվրոպական Միության, ԱՄՆ միջազգային զարգացման գործակալության, Ազգային ժողովրդավարական ինստիտուտի, Ժողովրդավարության ազգային հիմնադրամի և Բաց հասարակության հիմնադրամներ – Հայաստանի ֆինանսական աջակցությամբ:

«Ականատես» դիտորդական առաքելության ընդհանուր գնահատականը 2018 թ. ՀՀ Ազգային ժողովի արտահերթ ընտրությունների վերաբերյալ ներկայացված է զեկույցում` https://bit.ly/2Uapn26

Լուսաբանումը հետևյալ լրատվամիջոցներում`
News.am
Hetq.am
Aravot.am
Lragir.am