Գլխավոր էջ Նորություններ Հեռուստամարաթոնի քիչ հանգանակությունը քաղաքական մեկնաբանության կարիք ունի, գուցե հիասթափություն կա. Վարուժան Հոկտանյան
Նորություններ
2019 Նոյ
29

Հեռուստամարաթոնի քիչ հանգանակությունը քաղաքական մեկնաբանության կարիք ունի, գուցե հիասթափություն կա. Վարուժան Հոկտանյան

«Հեռուստամարաթոն 2019»-ին ընդամենը 9 մլն 856 հազար ԱՄՆ դոլար նվիրատվության, Հայաստանում ներդրումների պակասի և այլ հարցերի շուրջ Tert.am-ը զրուցել է Թրանսփարենսի Ինթերնեշնլ հակակոռուպցիոն կենտրոնի ծրագրերի ղեկավար Վարուժան Հոկտանյանի հետ: Ըստ Հոկտանյանի`  մարաթոնին քիչ գումար նվիրելը դժվար թե կոռուպցիայով է պայմանավորված, այդուհանդերձ նա նշում է` գուցե ավելի հիասթափություն կա:

Հոկտանյանի կարծիքով` մարաթոնին քիչ գումար նվիրելը գուցե պայմանավորված է ծրագրի երկարաժամկետ լինելու հանգամանքով: Պետք է նայել տարիների դինամիկան. կա հայտնի երևույթ՝ դոնորական հոգնածություն, երբ մարդիկ մտածում են՝ ժամանակն է, որ այս երկիրը դադարեցնի հանգանակումները և անցնի լուրջ ներդրումային ծրագրերի:

Պատճառն ավելի շատ տնտեսական ներկա մոդելն է: Այն տնտեսական մոդելը, որ գործել է  Հայաստանում, դեռ չի ապամոնտաժվել: Մենք փոքր շուկա ենք, ուստի ներդրողը պետք է մտածի այնպիսի ներդրումներ կատարել, որ հետագայում արտահանի: Առաջանում են աշխարհաքաղաքական հարցեր.  կոմունիկացիաներն են շատ սահամանփակ:

Թեպետ Համաշխարհային բանկի տվյալի համաձայն` 2017-ի համեմատ 2018-ին բարելավում կա, հակակոռուպցիոն քաղաքականությունը և նրա արդյունավետությունն ավելի ցայտուն կլինեն, եթե դրան զուգահեռ իրականացվեն տնտեսական, քաղաքական, սոցիալական արմատական բարեփոխումներ: Հոկտանյանը նկատի ունի այնպիսի տնտեսական բարելավում, որից ժողովրդի կենսամակարդակը կբարձրանա: Այլապես` այդ աճի հիմնական բարիքները կհասնի մի խավի, կամ մի տարածաշրջան կամ մի քանի ոլորտ: Կարևոր է՝ ինչպես է բաշխվում այդ աճը, ում միջև, ինչպես են օգտվում քաղաքացիները,  ովքեր են դրանից շահում կամ ովքեր են տուժում:

Կա՞ արդյոք ռեսուրս, պոտենցիալ, ինտելեկտ, որ այդ ամենը կարողանան փոխել, թե՞ ոչ: Կարևոր է, թե  որքանով կա դա փոխելու կամք և ցանկություն, գիտակցում, որ դա փոխելով իրենք կարող են խուսափել իշխանությունը կորցնելուց, ի վերջո նույն հանրապետականները դրա պատճառով կորցրին իշխանությունը:

Սկզբնաղբյուրը` Tert.am