Հասարակական գործիչների և կազմակերպությունների մի խումբ, այդ թվում Թրանսփարենսի Ինթերնեշնլ հակակոռուպցիոն կենտրոնը, պատմական գնահատելով 2018թ. ընթացքում մեր երկրի կյանքում տեղի ունեցած արմատական փոփոխություններն ու շրջադարձային զարգացումները, համարելով, որ ժողովրդի կամքով ձևավորված Ազգային ժողովը և ձևավորվելիք նոր կառավարությունը երկրի առաջ ծառացած խնդիրները լուծելու մարտահրավերների առաջ են կանգնած, անցած երկու ամսում ի մի բերելով անցած տարիների աշխատանքը, հետազոտությունները, վերլուծությունները, բացահայտումներն ու առաջարկությունները, վերամշակել և ձևակերպել է մի շարք ոլորտներում, ներառյալ` արդարադատության վերականգնման,

  • անցումային արդարադատության գործարկման,
  • կոռուպցիայի դեմ պայքարի,
  • դատական իշխանության ձևավորման,
  • կրթության լայնածավալ բարեփոխումների,
  • մարդու իրավունքների պաշտպանության,
  • տարածքային համաչափ զարգացման,
  • ընտրական օրենսգրքի նորոգման,
  • իշխանության ճյուղերի իրական տարանջատման խնդիրների և լուծումների սեփական ընկալումները որպես ՀՀ վերականգնման հայեցակարգ` ճանապարհային քարտեզ:

Նոր Հայաստանի բարեհաջող զարգացման համար վերոհիշյալ խնդիրների կարգավորման և առաջնահերթությունների լուծման բանաձևը հանրություն-իշխանություն աշխատանքային կապի ամրապնդման և զարգացման մեջ դիտարկելով, խումբը հարկ է համարում այդ խնդիրների լուծման եռակողմ մասնակցային ձևաչափ առաջարկել իշխանություններին: Մասնավորապես, առաջարկվում է ձևավորել հանձնախմբեր (աշխատանքային խումբ, հանձնաժողով կամ այլ մարմին), որոնք բաղկացած կլինեն 3 կողմերի պատվիրակներից`
1) ՀՀ օրենսդիր մարմին (խորհրդարանական բոլոր խմբակցությունների ներկայացուցիչների մասնակցությամբ),
2) գործադիր մարմին և
3)քաղաքացիական հասարակություն:

Բարեփոխումների վրա ազդեցությամբ և հրատապությամբ առաջնահերթություն է համարվում նախ 3 ոլորտային աշխատանքային խմբերի ձևավորումը.
1. Արդարադություն/անցումային արդարադատություն
2. Կոռուպցիայի հաղթահարման/կոռուպցիայի դեմ պայքարի
3. Կրթության բարեփոխում, հասանելիություն և որակ:

Սույն փաստաթուղթը մշակած խումբը Հայեցակարգում ներկայացված մարտահրավերները համարում է հրատապ և անհետաձգելի լուծումների առարկա, ըստ այդմ պատրաստակամ է իշխանությունների և շահագրգիռ այլ անձանց հետ օր առաջ քննարկել դրանք, և գտնել ամենաարդյունավետ լուծումները հանուն Հայաստանի Հանրապետության: Հայեցակարգը չի հավակնում անվիճելի կամ կատարյալ լինել, այն շոշափում է երկրի մի շարք, բայց ոչ բոլոր ոլորտների բարեփոխման ճանապարհներ, այստեղ բերված խնդիրների նկարագրերը և լուծման եղանակները կարող են փոփոխվել և վերանայվել ինչպես իրադարձություների և իրավիճակի փոփոխման, այնպես էլ հնարավոր շահագրգիռ քաղաքացիների, կողմերի, խմբերի և իշխանությունների հետ քննարկումների արդյունքում: Խումբը լայն հանրային իրազեկում Է իրականացնելու փաստաթղթին առնչվող զարգացումների մասին:

Հայեցակարգը հեղինակած խմբի անդամներն են` ըստ այբբենական հերթականության

Բաց հասարակության հիմնադրամներ - Հայաստան
Թրանսփարենսի Ինթերնեշնլ հակակոռուպցիոն կենտրոն
ժուռնալիստների «Ասպարեզ» ակումբ
Իրազեկ քաղաքացիների միավորում
Հայաստանի հելսինկյան կոմիտե
Հելսինկյան քաղաքացիական ասամբլեայի Վանաձորի գրասենյակ

Տես Հայաստանի Հանրապետության վերականգնմանն ուղղված անհրաժեշտ բարեփոխումների հայեցակարգը (ճանապարհային քարտեզ)

Կոռուպցիայի դեմ պայքար