«Հանրակրթության ոլորտում կոռուպցիոն ռիսկերի գնահատում» հետազոտության ներկայացում-քննարկում. Կապան
Թրանսփարենսի Ինթերնեշնլ հակակոռուպցիոն կենտրոնը և Հանրային քաղաքականության ինստիտուտը` ԱՄՆ Միջազգային զարգացման գործակալության աջակցությամբ «Պահանջատեր հասարակություն՝ հանուն պատասխանատու կառավարման» ծրագրի շրջանակներում իրականացրել են «Հանրակրթության ոլորտում կոռուպցիոն ռիսկերի գնահատում» ուսումնասիրությունը: Ս.թ. հունիսի 21-ին «Հանրային քաղաքականության ինստիտուտ» ՀԿ տնօրեն Արևիկ Անափիոսյանը և փորձագետ Հովհաննես Հովհաննիսյանը այն ներկայացրել են ոլորտի շահառուներին Կապանի Քաղաքացիական երիտասարդական կենտրոնում կազմակերպած քննարկման ընթացքում։
Ուսումնասիրության շրջանակներում վեր են հանվել հանրակրթական դպրոցներում վճարովի պարապմունքների, ներառական կրթության և դասագրքերի հրատարակման հետ կապված այն խնդիրները, որոնք կոռուպցիոն ռիսկեր են առաջացնում:
«Հանրակրթության ոլորտում կոռուպցիոն ռիսկերի գնահատում» ուսումնասիրությունը շահագրգիռ կողմերի հետ ներկայացվել և քննարկվել է Երևանում մարտի 17-ին: Դրան հաջորդել են մարզային հանդիպում-քննարկումները Հայաստանի մարզերի 12 քաղաքներում ինֆոտների և ՔԵԿ-երի աջակցությամբ: Հանդիպումն ուղիղ հեռարձակվել է Ժուռնալիստների «Ասպարեզ» ակումբի կողմից: Հանդիպումների և քննարկումների ընթացքում հնչած առաջարկությունները ներկայացվելու են ՀՀ կրթության և գիտության նախարարության աշխատանքային խմբին:
