Նորություններ

2018-2019թթ. Թրանսփարենսի Ինթերնեշնլ հակակոռուպցիոն կենտրոնը Բաց հասարակություն հիմնադրամներ – Հայաստանի աջակցությամբ իրականացրել է Պետական ֆինանսների կառավարման համակարգի բարեփոխումների վերանայված ռազմավարության 2016-2020 թթ. իրականացվելիք գործողությունների ծրագրի մի շարք միջոցառումների, ինչպես նաև ֆինանսների համակարգի գործունեության կատարողականի ցուցանիշների մոնիտորինգ, ինչը ԵՄ - Հայաստան ֆինանսական համաձայնագրով 2017-2018 թթ. համար նախատեսված՝ ԵՄ-ի կողմից ՀՀ-ին ֆինանսական օգնության տրամադրման նախապայման է:

Սեպտեմբերի 16-ին Միացյալ Թագավորություն ուսուցողական այցի շրջանակում Հայաստանի Արդյունահանող ճյուղերի թափանցիկության նախաձեռնության (ԱՃԹՆ) պատվիրակությունը, որի կազմում է ԹԻՀԿ գործադիր տնօրեն Սոնա Այվազյանը, հյուրընկալվել է Միացյալ Թագավորության կառավարության Գործարարության, էներգետիկայի և արդյունաբերական ռազմավարության վարչությունում։ Ուսուցողական այցի հիմնական նպատակն իրական սեփականատերերի բացահայտման ՄԹ-ի առաջավոր փորձի ուսումնասիրությունն է։

Սեպտեմբերի 16-ին տեղի է ունեցել հանդիպում «Ժողովրդավարություն՝ իրավունքի միջոցով» եվրոպական հանձնաժողովի (Վենետիկի հանձնաժողով) պատվիրակության փորձագետների հետ` քննարկելու դատաիրավական և հակակոռուպցիոն ոլորտի բարեփոխումների իրականացման ընթացքը Հայաստանում: Հանդիպման նպատակը դատական օրենսգրքում և հարակից օրենքներում նախագծված փոփոխությունների փաթեթի վերաբերյալ Հանձնաժողովի կարծիքը նախապատրաստելու համար մասնագիտական քննարկումների իրականացումն էր:  Ի թիվս այլ շահագրգիռ կողմերի, հանդիպմանը մասնակցել են քաղաքացիական հասարակության ներկայացուցիչներ, այդ թվում` ԹԻՀԿ իրավական հարցերով փորձագետ Հայկ Մարտիրոսյանը:

Սեպտեմբերի 14 -15-ը Աղվերանում տեղի է ունեցել Հայաստանի հետազոտական կենտրոնների համաժողով, որին մասնակցել է ԹԻՀԿ ծրագրերի ղեկավար Վարուժան Հոկտանյանը: Նա ներկայացրել է վերլուծական կենտրոնների հիմնական մարտահրավերները և առաջարկել է ստեղծել «պետություն-վերլուծական կենտրոններ-դոնորներ» կանոնավոր գործող հարթակ` հետագայում դրանում ներգրավելով նաև ՀԿ-երին, ակադեմիական հաստատություններին և մասնավոր սեկտորին: 

Որքանո՞վ են համապատասխանում կուսակցությունների քաղաքական նպատակների համար նախատեսված գումարներն իրենց իրական ծախսերին: Սեպտեմբերի 13-ին այս և այլ հարցերի  պատասխանում են «Առաջին ալիք»-ի «Խաղի կանոնները» հաղորդաշարի մասնակիցները, այդ թվում` ԹԻՀԿ ծրագրերի ղեկավար Վարուժան Հոկտանյանը:

Սեպտեմբերի 12-ին «Մեդիա կենտրոն»-ում տեղի է ունեցել քննարկում՝ «ԼՂ ՏԻՄ ընտրություններ, հետընտրական գնահատականներ» թեմայով, որի բանախոսներից էր Թրանսփարենսի Ինթերնեշնլ հակակոռուպցիոն կենտրոնի ընտրական ծրագրերի համակարգող Ալեքսեյ Պետրոսյանը, ով ներկայացրել է Արցախում ՏԻՄ ընտրությունների դիտարկումը «Ականատես» դիտորդական առաքելության շրջանակում` Արցախի «Քաղաքացիական հաբ» նորաստեղծ ՀԿ-ի հետ համագործակցությամբ:

Արդարադատության նախարարի տեղակալ Քրիստիննե Գրիգորյանի գլխավորությամբ սեպտեմբերի 11-ին մեկնարկել է Մարդու իրավունքների պաշտպանության նոր ազգային ռազմավարության տեսլականի և դրանից բխող գործողությունների ծրագրի մշակմանն ուղղված պանելային քննարկումների շարքը: Այն կազմակերպվել էր Արդարադատության նախարարության, ՄԱԿ-ի Զարգացման ծրագրի և Եվրոպական միության հետ սերտ համագործակցությամբ: Քննարկմանը մասնակցել են օրենսդիր և դատական իշխանությունների, պետական ու հասարակական կազմակերպությունների շուրջ երեք տասնյակ ներկայացուցիչներ, այդ թվում` ԹԻՀԿ իրավական հարցերով փորձագետ Հայկ Մարտիրոսյանը:

Սեպտեմբերի 10-ին մեկնարկել է Դատական և իրավական բարեփոխումների 2019-2023 թվականների ռազմավարության նախագծի հանրային քննարկումների շարքը: Քննարկմանը մասնակցել է ԹԻՀԿ իրավական հարցերով փորձագետ Հայկ Մարտիրոսյանը: Նա ներկայացրել է իր առաջարկ-հարցադրումները քննարկվող հարցերի կապակցությամբ: 

Սեպտեմբերի 9-ին Արցախում տեղի է ունեցել մամուլի ասուլիս, որի ընթացքում ԹԻՀԿ գործադիր տնօրեն Սոնա Այվազյանը և «Քաղաքացիական հաբ»-ի անդամ և Արցախում «Ականատես» դիտորդական առաքելության  ներկայացուցիչ Լուսինե Համբարձումյանը ներկայացրել են Արցախի Հանրապետությունում 2019 թ․ սեպտեմբերի 8-ին կայացած ՏԻՄ ընտրությունների քվեարկության օրվա դիտարկման նախնական գնահատականը։

Ստեփանակերտ, 2019 թ. սեպտեմբերի 9, ժամը 12:00

Արցախի Հանրապետությունում 2019 թ. սեպտեմբերի 8-ին կայացել են տեղական ինքնակառավարման մարմինների ընտրություններ, որոնք ընդհանուր առմամբ ընթացել են խաղաղ մթնոլորտում և քաղաքացիները հնարավորություն են ունեցել իրացնել իրենց ընտրական իրավունքը։ Առավել տարածում գտած խախտումները կրել են ոչ միտումնավոր և չհամակարգված բնույթ, իսկ լուրջ խախտումներն ու միջադեպերը եղել են դրվագային։