Նորություններ

«Շանթ» հեռուստաընկերության Հեռանկարի տաղավարում ԹԻՀԿ ծրագրերի ղեկավար Վարուժան Հոկտանյանը խոսել է Հայաստանում ընթացող հակակոռուպցիան պայքարի մասին: Հայաստանի համար օրակարգային է դառնում նախորդ իշխանության օրոք թալանածը հետ բերելու կարգավորումները: Խնդիրն այն է, որ թալանված գումարները դուրս են բերվել երկրից: Առկա ակտիվները պետք է հետ բերել` խտրական մոտեցումից զերծ մնալով, որպեսզի այդ ամենը լինի թափանցիկ և վերահսկելի: Թալանվածը հետ բերելու մյուս տարբերակը ենթադրում է փորձել ներդրումներ կատարել տնտեսության մեջ:

Թրանսփարենսի Ինթերնեշնլ հակակոռուպցիոն կենտրոնի գործադիր տնօրեն Սոնա Այվազյանը Փարիզում մարտի 20-22-ը  մասնակցել է Տնտեսական համագործակցության և զարգացման կազմակերպության (ՏՀԶԿ) Արևելյան Եվրոպայի և Կենտրոնական Ասիայի երկրների հակակոռուպցիոն ցանցի (ՀԿՑ) լիագումար նիստին:
Նիստին մասնակցել են նաև Արևելյան Եվրոպայի և Կենտրոնական Ասիայի երկրների հակակոռուպցիոն ոլորտում որոշումների կայացման գործընթացներում ներգրավված կազմակերպություններ, ՏՀԶԿ  կոռուպցիայի դեմ պայքարի հարցերով աշխատանքային խմբի անդամներ, միջազգային կազմակերպությունների և քաղաքացիական հասարակության ներկայացուցիչներ:

AD TV հարցազրույցում ԹԻՀԿ ծրագրերի ղեկավար Վարուժան Հոկտանյանն անդրադարձել է Հայաստանում կոռուպցիայի դեմ պայքարին: Ըստ Հոկտանյանի` դժբախտաբար լուրջ հետազոտություններ չեն արվել այդ ուղղությամբ: Ինչ վերաբերում է համակարգային կոռուպցիային, բուրգի կամ շղթայի վերևի մասը, որի շնորհիվ գործում էր նախկին համակարգը, կարծես թե կտրված է: Սակայն եթե շղթայի միջին և ստորին օղակներում կոռուպցիան չի վերացել, հետադարձի տարբերակ կա: Որքանո՞վ քաղաքական կամքը կստիպի միջին և ստորին օղակներին ավելի մաքուր աշխատել:

Բարձրաստիճան պաշտոնատար անձանց էթիկայի hանձնաժողովի աշխատանքների վերաբերյալ առաջացած քննարկումներին «Ազատության» հետ զրույցում անդրադարձել է ԹԻՀԿ ծրագրերի ղեկավար Վարուժան Հոկտանյանը, ով նախկինում բազմիցս քննադատել է հանձնաժողովի աշխատանքը: Հանձնաժողովը վաղուց պետք է լուծարված լիներ` ելնելով այն սահմանափակ ֆունկցիաներից, որ նա ունի և ելնելով նախորդ իշխանության օրոք ոչ պրոակտիվ մոտեցումներից:

Հրավիրում ենք քաղաքացիական հասարակության կազմակերպություններին (ՔՀԿ) մասնակցելու ՔՀԿ նպաստավոր միջավայրի ուսումնասիրության շրջանակներում իրականացվող հարցմանը։ Հարցումն իրականացվում է Արևելյան գործընկերության տարածաշրջանի բոլոր վեց երկրներում՝ Եվրամիության կողմից ֆինանսավորվող «Առաջընթացի դիտարկում, գործողության խրախուսում» ծրագրի շրջանակներում։ Հայաստանում հետազոտությունն անցկացվում է Թրանսփարենսի Ինթերնեշնլ հակակոռուպցիոն կենտրոնի կողմից: Հավաքագրված տվյալները կօգտագործվեն Հայաստանում քաղաքացիական հասարակության միջավայրը գնահատելու և համապատասխան զեկույցը մշակելու համար: Խնդրում ենք լրացնել հարցաթերթը՝ այցելելով հետևյալ հղումով՝ https://kwiksurveys.com/s/TwkqsLWu։ Խնդրում ենք հարցաթերթը լրացնել մինչև մարտի 31-ը: Հարցումը կտևի մոտավորապես 20-30 րոպե:

«Բազմազգ Վրաստան»  հանրային  շարժում կազմակերպությունը մարտի 14-16-ը Թբիլիսում կազմակերպել է «Հանրային անվտանգության և պահպանության ոլորտներում բարեփոխումներն ընդդեմ մարդու իրավունքների»  խորագրով եռօրյա աշխատաժողով, որին մասնակցել է  Թրանսփարենսի Ինթերնեշնլ հակակոռուպցիոն կենտրոնի փորձագետ Խաչիկ Հարությունյանը: ԹԻՀԿ փորձագետը ներկայացրել է հակակոռուպցիոն պայքարում ՀՀ ներկայիս իրավիճակը, վրացի գործընկերներից հետաքրքրվել Վրաստանի կողմից ներդրված ջանքերի և հարևան պետության կողմից ոլորտում առկա խնդիրների լուծման արդունավետ մեխանիզմներից:

Հայաստանում անցկացվող ՆԱՏՕ-ի շաբաթվա շրջանակներում մարտի 14-ին ՀՀ պաշտպանության նախարարությունը ՆԱՏՕ-ի բարեվարքության ամրապնդման ծրագրի թիմի հետ համատեղ ՊՆ վարչական համալիրում անցկացրել է Բարեվարքության ամրապնդման ծրագրի բարձրաստիճան առաջնորդների օրվա խորհրդաժողով՝ նվիրված բարեվարքության և լավ կառավարման բարեփոխումների հարցերին: Խորհրդաժողովին մասնակցել են ՀՀ պաշտպանական գերատեսչության և ՆԱՏՕ-ի ներկայացուցիչներ, միջազգային փորձագետներ՝ բարեվարքության, թափանցիկության և հաշվետվողականության սկզբունքները՝ որպես կայուն բարեփոխումների համար կարևոր գործոններ ուսումնասիրելու նպատակով: Միջոցառմանը մասնակցել է նաև ԹԻՀԿ հետազոտող Միքայել Ավետիսյանը:

Թրանսփարենսի Ինթերնեշնլ հակակոռուպցիոն կենտրոնի նախաձեռնությամբ մարտի 12-ին կազմակերպվել է հակակոռուպցիոն ինստիտուցիոնալ մոդելի վերաբերյալ աշխատանքային քննարկում: Քննարկմանը ներկա են եղել ՀՀ Ազգային ժողովի նախագահի տեղակալ Լենա Նազարյանը, ԱԺ պատգամավորներ, ՀՀ կառավարության և իրավապահ մարմինների, հասարակական կազմակերպությունների ներկայացուցիչներ և անկախ փորձագետներ: Միջոցառմանը զեկույցներով հանդես են եկել Տնտեսական համագործակցության և զարգացման կազմակերպության հակակոռուպցիոն ցանցի հրավիրված փորձագետներ Վալց Կալնինշը և Ռուսլան Ռյաբոշապկան։

Ժուռնալիստների «Ասպարեզ» ակումբը (ԺԱԱ) «Թրանսփարենսի Ինթերնեշնլ հակակոռուպցիոն կենտրոն» ՀԿ-ի հետ համատեղ՝ ԱՄՆ ՄԶԳ աջակցությամբ, «Պահանջատեր հասարակություն  հանուն պատասխանատու կառավարման» ծրագրի շրջանակում, իրականացրել է ՀՀ հանրակրթական դպրոցների նյութատեխնիկական և սանիտարահիգիենիկ չափանիշների վերաբերյալ մոնիտորինգ։ Այժմ բոլոր մարզկենտրոններում կազմակերպվում են վերոնշյալ մոնիտորինգի նախնական զեկույցի քննարկումներ, որոնց նպատակն է՝ լսել շահագրգիռ կողմերի նկատառումներն ու առաջարկները, որոնք ապագայում կներառվեն վերջնական զեկույցում։ Քննարկումները տեղի կունենան բոլոր մարզկենտրոններում ԺԱԱ հիմնած քաղաքացիական երիտասարդական կենտրոններում:

Իշխանության հակակոռուպցիոն պայքարի մասին «Մեդիալաբը» զրուցել է Թրանսփարենսի Ինթերնեշնլ հակակոռուպցիոն կենտրոնի ծրագրերի ղեկավար Վարուժան Հոկտանյանի հետ։ Ըստ Հոկտանյանի` դինամիկան դրական է, և կոռուպցիայի դեմ պայքարում ավելի ակտիվացել և ուժեղացել է քրեաիրավական պատժիչ բաղադրիչը, սակայն երբ կոռուպցիայի դեմ պայքարին զուգահեռ չեն արվում լուրջ քաղաքական, տնտեսական, սոցիալական բարեփոխումներ, ինչ-որ տեղ հակակոռուպցիոն պայքարը դառնում է ինքնանպատակ, դրա արդյունքում որոշակի հոգնածություն է առաջանում, և գործն առաջ չի գնում։