Կան հիմնավոր կասկածներ, որ փորձ է արվում թվացյալ մրցակցության տպավորություն ստեղծել, ինչի արդյունքում հնարավոր կլինի յուրացնել քաղաքացիների գույքը. Սոնա Այվազյան
«Ազատություն» ռադիոկայանի հետ զրույցում Թրանսփարենսի Ինթերնեշնլ հակակոռուպցիոն կենտրոնի գործադիր տնօրեն Սոնա Այվազյանը նշել է, որ Երևանի կենտրոնի 33-րդ թաղամասի (Ֆիրդուսի) և հարակից փողոցի կառուցապատմամբ զբաղվող 17 ընկերությունների մեծ մասը փոխկապակցված է Էդուարդ Մելիքյանի հետ, որը տարիներ առաջ նույն տարածքում կառուցապատում սկսած, սակայն այդպես էլ չավարտած ու սնանկացած «Գլենդեյլ Հիլզ» ընկերության բաժնետերերից էր։
ԹԻՀԿ-ն այս հանգամանքի վրա հրավիրել է իրավապահների ուշադրությունը՝ հանցագործության մասին հաղորդում ներկայացնելով ՀՀ հատուկ քննչական ծառայություն։ «Այդ նույն կազմակերպությունը, դնելով այլ դիմակ և մասնատվելով 17 այլ կազմակերպությունների և հանդես գալով այլ անուններով, իրականացնում է կառուցապատում։ Կառուցապատում իրականացնող ընկերության տնօրենը, որը «Գլենդեյլ Հիլզ»-ի ողջ կենսագրության մեջ եղել է, նաև կառավարել է «Սիթի Սենթր Դիվելըփմենթ»-ը, այդ ամբողջ ընթացքում այդ մարդը ներկայացրել է իրենց շահերը և հիմա նույն մարդը միայնակ ներկայացնում է 17 կազմակերպություններին», - մատնանշել է ԹԻՀԿ տնօրեն Սոնա Այվազյանը։
Պարզաբանելով, թե ինչու է որոշվել հանցագործության մասին հաղորդում ներկայացնել հատուկ քննչական ծառայությանը՝ Այվազյանը նշել է, որ ԹԻՀԿ ուսումնասիրությունը վկայում է, որ կան հիմնավոր կասկածներ առ այն, որ Էդուարդ Մելիքյանը և այլ անձինք, ոչ թե մեկ, այլ տասնյակ ընկերությունների անունից հանդես գալով, փորձում են թվացյալ մրցակցության տպավորություն ստեղծել, ինչի արդյունքում կկարողանան հեշտությամբ յուրացնել իրացման գոտում գտնվող քաղաքացիների գույքը։ «Քաղաքաշինության կոմիտեն պետք է կազմակերպեր մրցույթ, որն անհասկանալի պատճառներով չի իրականացվել, և ամբողջը հանձնվել է հենց այդ մեկ ընկերությանը։ Եթե նախորդ իշխանությունները դրա վրա աչք են փակել, թույլտվություն են տվել, դրա համար որոշումներ են ընդունել, Նարեկ Սարգսյանն է ներգրավվել այդ գործընթացներում, դա զարմանալի չէ, բայց մեզ համար խիստ զարմանալի և անընդունելի է հեղափոխությունից հետո այդ գործընթացի շարունակությունը», - ընդգծել է Սոնա Այվազյանը։
ԹԻՀԿ գործադիր տնօրենը նաև պնդել է, որ 33-րդ թաղամասում աշխատանքներ իրականացնելու համար կառուցապատողները չունեն անհրաժեշտ բոլոր փաստաթղթերը, այդ թվում՝ հաստատված նախագիծ։ «Գերակա հանրային շահի մասին որոշմամբ նրանք ստացել են այդ հիմնական թույլտվությունը, եթե կարելի է դա այդպես կոչել, բայց դրանից հետո պետք է լինի ճարտարապետահատակագծային առաջադրանք, նախագիծ, շրջակա միջավայրի վրա ազդեցության գնահատում, քաղաքաշինական փորձաքննություն և այդ փաստաթղթերն առկա չեն», - նշել է Այվազյանը։
Սկզբնաղբյուրը՝ «Ազատություն» ռադիոկայան։