Մեկնարկել է «Հանքարդյունաբերության ազդակիր համայնքները` ԱՃԹՆ գործընթացի լիարժեք մասնակիցներ» դրամաշնորհային ծրագիրը
Թրանսփարենսի Ինթերնեշնլ հակակոռուպցիոն կենտրոնը ԱՄՆ ՄԶԳ աջակցությամբ իրականացվող «Պահանջատեր հասարակություն՝ հանուն պատասխանատու կառավարման» ծրագրի շրջանակում հայտարարել էր դրամաշնորհային ծրագրերի առաջարկների մրցույթ՝ ներկայացնելու հանքարդյունաբերության ոլորտում թափանցիկ և հաշվետու կառավարման խթանմանն ուղղված դրամաշնորհային ծրագիր:
Մրցույթի արդյունքում ընտրված կազմակերպություններից է «ԷկոԼուր» տեղեկատվական ՀԿ-ն, որը ս.թ. հունվարի կեսից իրականացնում է «Հանքարդյունաբերության ազդակիր համայնքները` Արդյունահանող ճյուղերի թափանցիկության նախաձեռնության (ԱՃԹՆ) գործընթացի լիարժեք մասնակիցներ» դրամաշնորհային ծրագիրը:
Ծրագիրը նպատակ ունի ապահովել ԱՃԹՆ ստանդարտի` քաղաքացիական հասարակության մասնակցության, հասարակական դեբատների անցկացման և հասարակության կողմից որոշումների կայացման գործընթացի ապահովման կատարումը` ՀՀ Սյունիքի, Լոռու և Գեղարքունիքի մարզերում իրականացնելով ագրեսիվ քարոզարշավ, ինչպես նաև ԱՃԹՆ գործընթացում հանքարդյունաբերության ազդակիր համայնքների ներկայացուցիչներին դարձնել ԱՃԹՆ բազմաշահառու խմբի այլընտրանքային/գործող անդամներ` նրանց շահերի պաշտպանությունն ապահովելու և ԱՃԹՆ գործընթացում հանրային սեկտորի ներգրավվածությունն ընդլայնելու համար:
2017 թ. Հայաստանը դարձավ Արդյունահանող ճյուղերի թափանցիկության նախաձեռնության (ԱՃԹՆ) անդամի թեկնածու: Սա պարտավորություններ դրեց երկրի վրա` ապահովել արդյունահանող ճյուղերի թափանցիկությունը և հաշվետվողականությունը շահագրգիռ կողմերի` պետական, գործարար համակարգերի և քաղաքացիական հասարակության երկխոսության միջոցով: ԱՃԹՆ-ի շրջանակներում ձևավորվեց բազմաշահառու խումբ (ԲՇԽ), որը քննարկում և որոշումներ է կայացնում ԱՃԹՆ-ի հաշվետվության վերաբերյալ: