Գլխավոր էջ Նորություններ

Նորություններ

14.01.2016

Դատավորների հայտարարագրերը «պետք է ընթերցանության նյութ դառնան իրավապահների համար»

Բարձրաստիճան պաշտոնատար անձանց էթիկայի հանձնաժողովը հրապարակել է նոր նշանակումներ ստացած դատավորների գույքի և եկամուտների հայտարարագրերը, որոնք բազմաթիվ հարցեր են առաջացնում: Փորձագետների համոզմամբ՝ հայտարարագրերում նշված որոշ փաստեր կասկածի տակ են դնում այդ եկամուտների թափանցիկությունը, նկատելի է նաև հազարավոր դոլարների հասնող նվիրատվություններ ստանալու միտումը: Այդ կապակցությամբ «Ազատություն» ռադիոկայանը զրուցել է Թրանսփարենսի Ինթերնեշնլ հակակոռուպցիոն կենտրոնի (ԹԻՀԿ) գործադիր տնօրեն Վարուժան Հոկտանյանի հետ: Ըստ Հոկտանյանի՝ հայտարարագրերը չեն տալիս որտեղի՞ց դատավորներին այդքան գումար հարցի պատասխանը: Հարցի պատասխանը պետք է փորձել ստանալ, երբ ոչ միայն մի քանի լրագրող ու ՀԿ, այլ ողջ հանրությունը հարցնի ո՞վ է տվել, ինչո՞ւ է տվել, ե՞րբ է տվել և ինչի՞ համար է տվել և պահանջի պատասխանները:


07.01.2016

Lragir.am. ինչ է սպասվում իրենց եկամուտները թաքցնող պաշտոնյաներին

Կոռուպցիայի դեմ պայքարի խորհրդի երկրորդ` 2015 թ. դեկտեմբերի 28-ի նիստում ՀՀ արդարադատության նախարար Արփինե Հովհաննիսյանը ներկայացրել է «Վարչական իրավախախտումների վերաբերյալ ՀՀ օրենսգրքում լրացումներ կատարելու մասին» և «Հանրային ծառայության մասին» ՀՀ օրենքում լրացում կատարելու մասին» ՀՀ օրենքների լրամշակված նախագծերը, որոնք առնչվում են բարձրաստիճան պաշտոնատար անձանց գույքի և եկամուտների հայտարարագրերի ներկայացմանն ու դրանց իսկությանը: Դրանցով առաջարկվում է հայտարարագրերի ներկայացման ժամկետները խախտելու, կեղծ տվյալ ներկայացնելու, հայտարարագրման ենթակա տեղեկատվությունը թաքցնելու և այլ  դեպքերում պատասխանատվության մեխանիզմներ կիրառել ու տուգանքներ սահմանել: Այդ կապակցությամբ  Lragir.am-ը զրուցել է Թրանսփարենսի Ինթերնեշնլ հակակոռուպցիոն կենտրոնի (ԹԻՀԿ) գործադիր տնօրեն Վարուժան Հոկտանյանի հետ:


30.12.2015

Ֆիննախը շարունակում է թանկարժեք գնումները Դիլիջանի ուսումնական կենտրոնի համար

Ազատություն ռադիոկայան. ՀՀ ֆինանսների նախարարությունը շարունակում է թանկարժեք գնումները Դիլիջանի ուսումնական կենտրոնի համար: Այս անգամ շուրջ 250 միլիոն դրամի կահույք է գնվել: Գնման պայմանագիրը առանց բաց մրցույթի կնքվել է «Վի ընդ բի սթայլ» ընկերության հետ, որը մեկ ամիս առաջ ուսումնական կենտրոնին 41 միլիոն դրամի խոհանոցային սպասք էր մատակարարել: Կենտրոնի համար այս անգամ էլ առանց բաց մրցույթի շինարարական պատվեր է ստացել «Սահակյանշին» ընկերությունը, որն ավելի քան 160 միլիոն դրամով պետք է կառուցի 5 քոթեջների ճանապարհները: Թրանսփարենսի ինթերնեշնլ հակակոռուպցիոն կենտրոնի գործադիր տնօրեն Վարուժան Հոկտանյանն ասում է, որ Դիլիջանի ուսումնական կենտրոնի վրա կատարված շռայլ ծախսերը կարող են արդարացված համարվել, եթե այն դառնա տարածաշրջանային ուսումնական կենտրոն: Այդ դեպքում էլ անգամ Հոկտանյանի համար ընդունելի չեն նման մեծ ծախսերը աղքատության և ծանր տնտեսական պայմաններում: 


29.12.2015

Հայտարարագիր չներկայացնող պաշտոնյաներին քրեական պատի՞ժ է սպառնալու

Ս.թ. դեկտեմբերի 28-ին Կոռուպցիայի դեմ պայքարի խորհրդի նիստին արդարադատության նախարար Արփինե Հովհաննիսյանը ներկայացրել է «Վարչական իրավախախտումների վերաբերյալ ՀՀ օրենսգրքում լրացումներ կատարելու մասին» և «Հանրային ծառայության մասին» ՀՀ օրենքում լրացում կատարելու մասին» ՀՀ օրենքների լրամշակված նախագծերը: Դրանցում առաջարկվում է բարձրաստիճան պաշտոնատար անձի գույքի, եկամուտների և փոխկապակցված անձանց մասին հայտարարագիր ներկայացնելու պարտականություն ունեցող անձի կողմից այդ հայտարագիրը սահմանված ժամկետում չներկայացնելու համար առաջին փուլով նախատեսել նախազգուշացում, ապա տուգանք: Թրանսփարենսի ինթերնեշնլ հակակոռուպցիոն կենտրոնի (ԹԻՀԿ) գործադիր տնօրեն Վարուժան Հոկտանյանը Armtimes.com-ի հետ զրույցում ասել է, որ նիստի ժամանակ ինքը Արդարադատության նախարարից հետաքրրքրվել է՝ իսկ ի՞նչ են անելու, եթե տուգանվելուց հետո էլ պաշտոնատար անձը չներկայացնի հայտարարագիրը: «Նախարարն ասել է, որ նոր «Քրեական օրնեսգրքով» կկարգավովի:


28.12.2015

ԹԻՀԿ-ը մասնակցել է Կոռուպցիայի դեմ պայքարի խորհրդի երկրորդ նիստին

Ս.թ. դեկտեմբերի 28-ին կառավարությունում տեղի է ունեցել Կոռուպցիայի դեմ պայքարի խորհրդի երկրորդ նիստը, որին մասնակցել են նաև քաղաքական ուժերի, միջազգային կազմակերպությունների, քաղաքացիական հասարակության ներկայացուցիչները, այդ թվում՝ Թրանսփարենսի Ինթերնեշնլ հակակոռուպցիոն կենտրոնի (ԹԻՀԿ) գործադիր տնօրեն Վարուժան Հոկտանյանը և փորձագետ Խաչիկ Հարությունյանը: Հարությունյանը հանդես է եկել «Մասնավոր հատվածը և կոռուպցիայի դեմ պայքարը» զեկույցով, որն ի գիտություն է ընդունվել նիստի ընթացքում: Զեկույցում նա ներկայացրել է իրավիճակը Հայաստանում ըստ միջազգային ուսումնասիրությունների և հետազոտությունների, արձանագրված խնդիրներն ու դրական միտումները, ինչպես նաև կոնցեպտուալ մակարդակում որոշակի կարծիքներ և՛ բիզնես-պետություն առաջին մակարդակում, որտեղ նախաձեռնող կողմ հանդես է գալիս բիզնեսն ինքը, և բիզնես-պետություն երկրորդ մակարդակում, որտեղ դասական առումով պետությունն է ի կատար ածում իր իսկ պարտավորությունները խնդրի շուրջ:


27.12.2015

Նույն տնտեսական փտած մոդելով փորձում են էլի վարկեր ներգրավել

ՀՀ կառավարությունը 2016 թ. նախատեսում է ՀՆԱ - արտաքին պարտք հարաբերակցությունը հասցնել մոտ 50 տոկոսի, ինչը մասնագետները ռիսկային շեմ են համարում: Խնդրի շուրջ Lragir.am-ը զրուցել է տնտեսագետ, Թրանսփարենսի Ինթերնեշնլ հակակոռուպցիոն կենտրոնի (ԹԻՀԿ) փորձագետ Արտակ Մանուկյանի հետ: Նա անդրադարձել է պարտքի ավելացման պատճառներին, վարկերի ծախսի անարդյունավետությանը: Արտակ Մանուկյանի կարծիքով՝ արդյունավետ կլինի, եթե այդ վարկերը որոշակիորեն փոխեն մեր տնտեսական մոդելը:


26.12.2015

«Պաշտոնյան հանգիստ կարող է չգրանցել այն, ինչն ինքն իրականում ունի»

Ս.թ. դեկտեմբերի 26-ին «Ասպարեզ» հանրային ռադիոն հյուրընկալել է Թրանսփարենսի Ինթերնեշնլ հակակոռուպցիոն կենտրոնի իրավախորհրդատու Հերիքնազ Տիգրանյանին: ՀՀ պաշտոնյաների գույքի և եկամուտների հայտարարագրերի վերաբերյալ խոսելիս՝ նա անդրադարձել է հետևյալ հարցերին. արդյո՞ք բարձրաստիճան պաշտոնյաների ներկայացրած գույքի և եկամուտների հայտարարագրերի միջոցով կարելի է ընդհանուր պատկերացում կազմել նրանց ունեցած իրական եկամուտների և կուտակած հարստության մասին: Մեր երկրում բարձրաստիճան պաշտոնյաները ինչպիսի՞ մեխանիզմներ  են կիրառում իրենց ունեցած ստվերային եկամուտները թաքցնելու համար: Մեծահարուստների կողմից եկամուտների և հարկերի իրական չափերը թաքցնելը չի՞ նպաստում ստվերային տնտեսության ձևավորմանը: Պաշտոնյան հանգիստ կարող է չգրանցել այն, ինչն ինքն իրականում ունի, և դա որևէ իրավական հետևանքի չհանգեցնի: Տիգրանյանն առաջարկում է օրենքը մի փոքր ավելի խստացնել:


25.12.2015

«Ասպարեզ» հանրային ռադիո. գնահատական ՀՀ սահմանադրական փոփոխությունների հանրաքվեի ընթացքին

Ս.թ. դեկտեմբերի 25-ին «Ասպարեզ» հանրային ռադիոյի հյուրը Թրանսփարենսի Ինթերնեշնլ հակակոռուպցիոն կենտրոնի իրավախորհրդատու Հերիքնազ Տիգրանյանն էր: Հաղորդման ընթացքում անդրադարձ է կատարվել ՀՀ սահմանադրական փոփոխությունների հանրաքվեի ընթացքին, միջազգային դիտորդների գնահատականին և «Քաղաքացի դիտորդ» նախաձեռնության աշխատանքին: Ըստ Հերիքնազ Տիգրանյանի՝ հանրաքվեի գործընթացը հեռու էր ժողովրդավարական երկրին բնորոշ գործընթաց լինելուց, քվեարկության ժամանակ քվեարկողի ազատ կամքի արտահայտումը չի դրսևորվել: Այն ընտրակեղծիքները՝ քվեատուփի լցոնումները, ճնշումները, ահաբեկումները, սպառնալիքները, բացակաների փոխարեն քվեարկությունը, բազմակի քվեարկությունը և այլ դեպքերը բնականաբար ունակ էին ազդելու քվեարկության արդյունքների վրա:


24.12.2015

Առաջարկներ ԵՏՄ վնասները մեղմելու վերաբերյալ

Եվրասիական տնտեսական միությանն (ԵՏՄ) անդամակցելուց հետո մի շարք տնտեսագետներ առայժմ միայն Հայաստանի տնտեսության կրած վնասների մասին են խոսում: Թրանսփարենսի ինթերնեշնլ հակակոռուպցիոն կենտրոնի փորձագետ, տնտեսագետ Արտակ Մանուկյանը ներկայացնում է ԵՏՄ-ին անդամակցելու Հայաստանի մարտահրավերներն ու հակասություները: «Առավոտ» օրաթերթի հետ զրույցում նա բացասական հետևանքները մեղմելու համար առաջարկում է ԵՏՄ պետգնումների ընդհանուր համակարգ ստեղծել, որով հնարավոր կլինի մասնակցել տնտեսական միասնական տարածքի գնումներին: Միասնական պորտալը կնվազեցնի Հայաստանում միջնորդավորված գնումները, օրինակ՝ տեսնելով, որ ավելի էժան գներով առաջարկ կա, անմիջապես այդ ընկերությունից պետգնումներ կատարել:


24.12.2015

Ազատություն ռադիոկայան. գնումներ առանց բաց մրցույթի

Ազատություն ռադիոկայան. Թրանսփարենսի Ինթերնեշնլ հակակոռուպցիոն կենտրոնի (ԹԻՀԿ) հրապարակած զեկույցի համաձայն՝ 2014-ին Հայաստանում առանց բաց մրցույթի իրականացվել է 178 մլրդ դրամի պատվեր: Զեկույցում նշվում է, որ 2014-ին պետական գնումների շուկայում նկատվում է կայուն միտում՝ գնումների հիմնական մասը իրականացվում է ոչ մրցակցային հիմունքներով, ինչը մեծացնում է ընտրվող մասնակցի կախվածությունը պատվիրատուից: ԹԻՀԿ փորձագետ Արտակ Մանուկյանի գնահատմամբ՝ նախորդ կառավարության գործունեության շրջանի համեմատ, գնումների ոլորտում իրավիճակը վատթարացել է: «Թափանցիկության մասով կա բավականաչափ մեծ հետընթաց, ավելին՝ տվյալների մուտքագրման նկատմամբ ընդհանրապես պատշաճ հսկողություն չկա»: