Դասընթացի մասնակցության հրավեր
«Թրանսփարենսի Ինթերնեշնլ հակակոռուպցիոն կենտրոն» հասարակական կազմակերպությունը (ԹԻՀԿ) Ժուռնալիստների «Ասպարեզ» ակումբի, «Հետաքննող լրագրողներ» հասարակական կազմակերպության, Քաղաքացիական զարգացման և համագործակցության հիմնադրամի, Բազելի կառավարման ինստիտուտի (ԲԿԻ, Շվեյցարիա) և Ոչ առևտրային իրավունքի եվրոպական կենտրոնի (Հունգարիա) հետ համատեղ ԱՄՆ ՄԶԳ-ի աջակցությամբ իրականացնում է «Պահանջատեր հասարակություն՝ հանուն պատասխանատու կառավարման» ծրագիրը, որի նպատակն է ակտիվացնել քաղաքացիների ներգրավվածությունն ու վերահսկողությունը Հայաստանում թափանցիկություն ու հաշվետվողականություն խթանող բարեփոխումների գործընթացներում:
Ծրագրի շրջանակներում «Թրանսփարենսի Ինթերնեշնլ հակակոռուպցիոն կենտրոն» հասարակական կազմակերպությունը և Բազելի կառավարման ինստիտուտը հրավիրում են կառավարման թափանցիկության և հաշվետվողականության հարցերով շահագրգիռ հասարակական կազմակերպությունների (ՔՀԿ) և ակտիվ քաղաքացիական խմբերի ներկայացուցիչներին մասնակցելու հետևյալ թեմաներով դասընթացներին.
- Հանրային քաղաքականության մոնիթորինգի և ջատագովության մասնակցային մեթոդներ (մայիսի 4-6, 2015 թ.)
- Հանրային ծրագրերի/նախաձեռնությունների կոռուպցիոն ռիսկերի գնահատման մեթոդներ (մայիսի 7-8, 2015 թ.):
Վերը նշված դասընթացներին մասնակցելու համար խնդրում ենք լրացնել կից դիմում-հայտը: Հայտերի ընդունման վերջնաժամկետն է ս.թ. ապրիլի 28-ը, ժամը 10:00-ը:
Դիմում-հայտերի հիման վրա կկատարվի ՔՀԿ-ների ներկայացուցիչների ընտրությունը ըստ հետևյալ չափանիշների՝
- Կազմակերպության ոլորտային փորձառությունը հանրային քաղաքականության մոնիթորինգի, հետազոտության և ջատագովության գործընթացներում
- Կազմակերպության առաջիկա պլանները դասընթացի ընթացքում ստացված գիտելիքները կիրառելու ուղղությամբ
- Կազմակերպության պատրաստակամությունը/հնարավորությունը և մասնակցի կարողությունը ձեռք բերված գիտելիքները այլ ՔՀԿ-ներին և քաղաքացիական ակտիվ խմբերին փոխանցելու մեջ:
Դասընթացներից յուրաքանչյուրին մասնակցելու համար կընտրվի 20 մասնակից՝ ամեն կազմակերպությունից ոչ ավել քան մեկ հոգի: Դասընթացին մասնակցած ՔՀԿ-ները և նրանց ներկայացուցիչները հետագայում հնարավորություն կունենան ստացված գիտելիքների հիման վրա փոքր դրամաշնորհների միջոցով իրագործել իրենց գաղափարները:
Խնդրում ենք հայտերն ուղարկել [email protected] էլեկտրոնային փոստին` նամակի վերնագրում նշելով այն դասընթացի անվանումը, որին ցանկանում եք դիմել: Լրացուցիչ հարցերի դեպքում խնդրում ենք զանգահարել 010 569589 կամ 010 569689 հեռախոսահամարներով կամ գրել վերը նշված էլեկտրոնային փոստին:
«Թրանսփարենսի Ինթերնեշնլ հակակոռուպցիոն կենտրոն» հասարակական կազմակերպությունը հիմնադրվել է 2000 թ.՝ ներկայացնելով Թրանսփարենսի Ինթերնեշնլ համաշխարհային հակակոռուպցիոն շարժումը Հայաստանում: Կազմակերպության առաքելությունն է կոռուպցիան նվազեցնելու ու ժողովրդավարությունն ամրապնդելու ճանապարհով նպաստել լավ կառավարմանը Հայաստանում:
